Հայերն Արգետինայում ժամանակավոր աշխատանքի իրավունք կստանան

26

Հայաստանում աշխատող արգենտինացիներն ավելի շատ են, քան Արգենտինայում աշխատող հայերը։

ՀՀ քաղաքացիներն Արգենտինայում առանց մուտքի վիզայի 3 ամիս աշխատելու իրավունք կստանան։ Այդ նպատակով ՀՀ կառավարությունն ԱԺ–ին առաջարկում է վավերացնել «Արգենտինայի և Հայաստանի Հանրապետությունների միջև արձակուրդի և աշխատանքի ծրագրի մասին համաձայնագիրը»։ Այս մասին այսօր ԱԺ արտաքին հարաբերությունների մշտական հանձնաժողովի նիստում հայտնեց ՀՀ փոխարտգործնախարար Գրիգոր Հովհաննիսյանը։

Նրա խոսքով` համաձայնագիրը նույն իրավունքն է ընձեռում նաև արգենտինացիներին, և, որքան էլ տարօրինակ է, արգենտինացիներին այս իրավունքն ավելի անհրաժեշտ է։

Հարցին, թե երկու երկրներում քանի քաղաքացու շահերից է բխում համաձայնագրի վավերացումը, Հովհաննիսյանը պատասխանեց. «Արգենտինայի պարագայում, կարծես, ավելի հստակ է կարիքը, քան մեր։ Արգենտինյան ընկերության` Հայաստանում իրականացվող ծրագրերի շրջանակում տարեկան մի քանի հարյուր երիտասարդներ են այցելում Հայաստան։ Մենք ընդամենը ունենք 100-ի չհասնող ուսանողներ Արգենտինայում»։

Փոխնախարարը նաև հայտնեց, որ համաձայնագիրը վերաբերելու է երկու երկրների 18-35 տարեկան քաղաքացիներին։

Այդուհանդերձ, Արգենտինայում գտնվելու ընթացքում աշխատելու ցանկություն ունեցող ՀՀ քաղաքացիներ կան։

«Թեև մեծ թիվ չեն կազմում, բայց կան երիտասարդներ թե՛ Հայաստանում և թե՛ Արգենտինայում, որոնք այդ երկրներում կարճատև այցի ընթացքում, երբ մեկնում են սովորելու կամ հանգստանալու, օրինական հիմքերով աշխատելու ցանկություն են հայտնում»,– ասաց Գրիգոր Հովհաննիսյանը։

Խորհրդարանական հանձնաժողովը քննարկման արդյունքում հավանություն տվեց ԱԳՆ առաջարկին ու որոշեց համաձայնագիրը ներառել հենց վաղը մեկնարկող նիստերի օրակարգում։

Ի դեպ, համաձայնագիրը ՀՀ և Արգենտինայի միջև ստորագրվել է 2014թ–ին, բայց Հայաստանը մինչև հիմա չի վավերացրել։

Իսկ 2011թ–ից երկու երկրների միջև գործում է մուտքի ազատական ռեժիմ, որն առանց վիզայի 3 ամսվա այցելության իրավունք է ընձեռում, բայց առանց այդ ընթացքում աշխատանքի հնարավորության։

 

Загрузка...